مساء الخير أعزائى المشاهدين .. أهلا
بحضراتكم النهاردة فى اولى مبارايات منتخبنا فى تصفيات كأس العالم للتقدم ،هذه
المباراة العصيبة التى انتظرها الملايين لسنوات أينعم فى قبلها .. بس دى جت بعد
شوقة ..حمد لله على السلامة !
المهم ، أحب الأول اصف لحضرتك اللى قدامك ،
قدامك دلوقتى لعيبة فى أرض الملعب و لعيبة أكتر على "دكة الاحتياطى
"
النهارده يا فندم التشكيل كالتالى 2-6 -2
تقولى ده تشكيل ميكسبش .. اقولك ربنا يستر !
مصرعندها رواج فى "صناع
الألعاب" –اللهم لا حسد- اللى بيبدأوا اللعبة الحلوة و اللى اذكر مما
توافاهم الله (جيكا- مينا دانيال-..........
و طبعا لسه فى برده اللى متواجدين فى أرض
الملعب بكفائتهم زى ما احنا شايفين "ربنا يديهم الصحة ".
أمامنا "حارس المرمى" اللى
بيعرف "يسيس" أموره ، أحب افكركوا ان من غيره ممكن يدخل فينا
اهداف كتير .. بس برده هو مش كل المنتخب و مينفعش يبقى "كابتن" .
أما عن "الدفاع" فهم ناس
بيستميتوا لدفاعهم عن منتخب بلدهم و ربما لا تُلقى عليهم الأضواء !
تسألنى على "الفراودة" فأحب
اطمنك ان منتخبنا ضعيف فى الحتة دى مش نقص مواهب –لا سمح الله – بس مش بيحوذوا على
تدريب كويس رغم انهم اصحاب اهداف التقدم ..... عشان كده مبنكسبش
و نيجى بقى ل "دكة الاحتياطى" فمعظمهم
فراودة شباب و ذوى كفاءة .. لكن معرفش يا اخى ايه سر وجودهم على الدكة مش
جوه !!
متنساش حضرتك المصورين و الصحفيين اللى
بيمثلوا "تأريخ" الماتش ده ... و "نخبة" من العيال
الصغيرة اللى بتدى الكورة للعيبة .. تقولى ليه قولتهم .. أصل انا لاقيهم على
"الشاشة" قلت أقولهم و بالمرة أفكرهم انهم ملهومش لازمة و مش
أبطال !!!!!
أحب ألفت نظر حضراتكم ان "المعلَقين"
زيى كتييييير و ممكن كل واحد يخليك تشوف الماتش بطريقته و يقولك معلومات ممكن
تصدقها ، بس ... عشان انت بتشوف الماتش من خلاله
و لو حد من حضراتكم نسى يسألنى عن الحكم
فعايز أقولك (هذا الماتش يأتيكم بلا حكم )!!
أخيرا اعزائى المشاهدين دعونا نشاهد المباراة
نتمنى من الله التوفيق .
